شرح اساليب لغة عربية المرحلة الابتدائية

بداية هنتعرف على ادوات كل اسلوب منهم

اولا: اسلوب النهي : اداته (لا)

ثانيا: اسلوب النفى: ادواته (ما - لم - لن - لا)

يعنى مجرد ما اشوف لم او لن او ما اعرف على طول ان ده اسلوب نفى

طيب (لا) ازاى اعرف اذا كانت (لا ناهية) او (لا نافية)

بكل بساطة هنقول لاولادنا انى لو طلبت منك ماتعملش شئ معين واستخدمت كلمة (لا) يبقى ده اسلوب نهى و(لا) هنا تسمى (لا ناهية)

زى مثلا لا تضرب أخيك - لا تقطف الازهار - لا تلوث النيل

اهو فى كل الجمل دى انا طلبت منك شئ صح ؟؟ ايوة صح - تمام يبقى ده اسلوب (نهى) ولا هنا اسمها (لا ناهية)

طيب لو انا عرفتك حاجة او اخبرتك بشئ معين انه محصلش او مش بيحصل او مش هيحصل او بنفى حاجة معينة من غير ما اطلب منك تعمل حاجة واستخدمت كلمة (لا) يبقى ده اسلوب نفى و(لا) هنا هيبقى اسمها (لا نافية)

مش فاهم

هقولك مثال عشان تفهم

يعنى مثلا لما اقولك [ لا تحب اميرة سماع الموسيقى]

هاااا انا هنا طلبت منك حاجة ؟؟؟ لا

طيب اخبرتك بحاجة ؟؟ ايوة .. اخبرتك ان اميرة مش بتحب تسمع موسيقى

خلاص يا بطل تبقى دى (لا نافية) وده اسلوب نفي

اعتقد كدة فهمت

هقولك بقى جملتين انت تقولى مين فيهم (لا ناهية) ومين فيهم (لا نافية)

(١) محمد لا يكذب ابدا.

(٢) يا محمد لا تكذب.

هااااااا

ايوووووة برافوا عليك اول واحدة (لا نافية) ليه؟؟ عشان اخبرتك وعرفتك ان محمد مش بيكذب

وبرافوا التانية (لا ناهية) لانى طلبت منك شئ .. طلبت منك متكذبش

.

.

اسلوب النهى والنفى

انا عندى جملة مثبتة بتقول [الولد يلعب فى الشارع]

وعايزة استخدم فيها اسلوب النهى

يبقى هقول ايييييه؟؟

تمام [ لا تلعب فى الشارع] برافوا عليك

طيب يا شطور هى هى نفس الجملة وعايزة استخدم فيها اسلوب نفى

يبقى هقول ايه؟؟

تمام [ الولد لا يلعب فى الشارع]

.

.

درس سهل وبسيط خاااالص

متهيألى بقى سهل نفرق بينهم ولا اييييييه؟؟؟

.

.

التدريبات بقى هنكتب لاولادنا مجموعة جمل شبه اللى فوق دى وهما يحددوا نوع الاسلوب (نفى) ولا (نهى)

او نكتبلهم مجموعة جمل عادية مثبتة واطلب منه يستخدم اسلوب النفى او يستخدم اسلوب النهى.