كورس تاسيس الاضواء للعام الجديد 2026
فاطمة صحبتي اتجوزت من شهر واحد بس واتفاجئت أنها طالبة الطلاق، والسبب يبان مضحك لكن فعلًا محمد جوزها كان عنده مشكلة فريدة من نوعها!
يمكن أغلبنا كبنات مبنركزش في تفاصيل كتير فترة الخطوبة، وبنركز بس على
حنيته
أسلوبه وقت النقاش
أهله
تربيته
انتظامه في شغله
اهتمامه بالتواريخ الخاصة والعامة
لكن بيفوتنا حاجات كتير مبنفكرش فيها،
زي مثلًا
هل بيمشي وهو نايم؟
بيرمي هدومه في الأرض ولا في طبق الغسيل!
بيغسل أسنانه يوميًا ولا سنويًا!
البرفيوم بيتحط بعد الدش ولا فوق العرق
بيدخل بالجزمة ع السجاد ولا مُنظم
بيشخر وهو صاحي أو نايم؟
تفاصيل كتير احيانًا بتصدم البنت في حبيب عمرها وتبدأ تنزل من كوكب الأحلام الوردية، لكوكب الكوارث المستخبية.
ومن هنا بيحصل حاجتين:
_يا البنت بتتقبل طبيعته وتحاول تتأقلم وياه.
_يا بترفض الواقع وتبدأ المشاكل والنفور لحد ما يتم الطلاق وننزل بتتر "يابوياااا كنت منعتنييييييي وانا مش معاكككك الكوووون هلااااااككككك".
فاطمة زميلتي من أرق البنات الـ ممكن حد يتعامل معاها، لطيفة بشكل مبالغ وحياتها وردية اوڤر، حاولت كتير أعرفها أن مخدات الريش والجري تحت المطر واللعب بالدقيق كل دي حاجات ممكن نشوفها في الكارتون، لكن مش ضروري ننفذها.
اولا لأن المخدة لو اتقطعت والريش طار هنخسر تمن القماش،
والدقيق لو اتبعتر هننضف مكانه ونلمع
والمطر لو جرينا تحتيه هناخد برد وبنادول،
وفي وقت ما بنكون مسؤولين بتكون النضافة والصحة اهم بكتير من اللعب والتنطيط.
بس واضح أن فرق الشخصيات بينا والمسافة طويلة، لا عمرها صدقتني ولا أنا عمري صدقت عالمها الوردي.
ومع أول شهر واحد بس جواز، اتفاجيء أن فاطمة بعتالي "شهيرة أنا عايزة اتطلق؟"
محمد جوزها ده حبيب عمرها من وهي طفلة حرفيًا، مكتوبين لبعض من قبل ما يفهموا يعني إيه حب واختيار.
سألتها "ليه يا فهودي "معلش أنا بدلعها كده"، دانتي مكملتيش شهر واحد بس جواز؟ حصل إيه!"
بعتتلي صورة مُريبة وبشعة لمحمد جوزها وبتقولي "ده شكله وهو نايم، وبخاف منه طول الليل بيعمل اصوات مرعبة".
كنت فاكرة أن فهودي تقصد بالأصوات دي أنه بيشخر مثلًا، رغم أن منظر الصورة بيقول أنه ملبوس مش نايم..
وقولتلها بهزار "مش قولتلك الحياة الوردية دي مش موجودة بعد الجواز، يابنتي أي راجل بيكون راجع من شغله تعبان واغلبهم بيناموا كده، أنتي بس عشان ماكنش عندك اخوات شباب فمشوفتيش حياتهم العادية في البيت"
لكني اتفاجئت بيها بتقولي "لا يا شهيرة، مش بيشخر.. ده بيقعد يقول وااااااءءء وااااااء بس بصوت خشن وبشع، كأنه بيتحول لشيطان، وكذا مرة صحيته من خوفي وبيقومخمش فاكر حاجة خالص".
واااء؟؟
ايه المشكلة العجيبة دي!
غصب عني ضحكت في سري، وقولتلها "هو محمد مامته موجودة صح؟"
قالتلي "اه الحمد لله ربنا يديها الصحة".
اقترحت عليها بدل ما تشكي لأهلها في حاجة خاصة زي دي، تسأل حماتها هي اكتر شخص حافظ أبنها وأكيد عندها الحل.
وافقت فاطمة على الإقتراح،
وتاني يوم انتظرتها تخلص زيارة حماتها وتحكيلي النتيجة.
وعلى الساعة عشرة بليل كده لقيت فاطمة بتتصل بيا!
_خير عملتي إيه ؟
_لسه جاية من عند حماتي أهو.
_طب وقالتلك إيه ؟
_قالت كلام ميدخلش العقل يا شهيرة، أنا حاسة أن الحل الوحيد انفصل عنه وارتاح، أنا حياتي بقت كلها خوف ورعب من يوم ما دخلت بيته.
_ليه يابنتي احكيلي طيب قالت إيه وهساعدك.
_بصي يا شهيرة،
حماتي عايزة تقنعني أن محمد جواه طفل مبيكبرش،
وحكت لي قصة كلها خرافات غريبة عن طفولته، لما محمد دخل دكان مهجور في المنطقة ومحدش شافه، وقعدوا يومين يدوروا عليه ومن بعدها لقوه خارج من الدكان ده زي الفل ومفيهوش اي حاجة، الـ اختلف بس أن محمد وقت النوم كان بيرجع طفل رضيع، بيبكي وعايز الـ يهدهده طول الوقت.
_عايزة نصيحتي؟
_ياريت يا شهيرة انا تايهة أوي وتعبانة.
_عندك حلين،
يا تتأقلمي مع محمد على حالته لأن مفيش منها ضرر، يا تصارحيه وتاخديه الدكان ده من تاني ومعاكوا شيخ يحل مشكلته ويعالجه.
_بصي يا شهيرة انا في حاجات كتير مقولتهاش، منها مثلًا أن محمد بيقوم يمشي وهو نايم يكسر في البيت ومرة ضربني وهو مش حاسس ولما سمع صوت صريخي فاق وماكنش فاهم مين عمل كده، فـ من ناحية الضرر أنا متضررة، لكن موضوع شيخ وعلاج والكلام ده انا طول عمري بنت ناس وعمري ما واجهت حاجات زي دي، أنا خدت قراري في الإنفصال وكفايا عليا الـ شوفته.
_طب وحبك لمحمد يا فهودي؟ مش أنتي الـ كنتي بتقعدي تقولي اشعار عنه وعن قصة حبكوا؟ ليه لما نزلتي لأرض الواقع قررتي تهربي، مش قولتلك الحياة مش وردية يا فاطمة ومحتاجة تتقبليها بواقعها علشان تعيشي.
_لا يا شهيرة،
أنا ماكنتش غلطانة في أفكاري وخيالي، وبالفعل أنا عيشت الحياة الوردية الـ انتي بتنكري وجودها وعملت كل حاجة وياه، لكن هو مصارحنيش هو وأهله بجزء مهم كان المفترض يقولولي عنه، والكدب نهايته خراب.
_يعني انتي اتجوزتيه علشان الجانب الحلو بس وياه؟
يعني مع أي ابتلاء هتخربي بيتك بسهولة كده؟
_شهيرة أنا عايزة اقفل معلش، مش هقدر أسمع منك اي نصايح دلوقتي.
هنا
تعليقات
إرسال تعليق