مذكرة انجليزى تالتة اعدادى سهلة وبسيطة المنهج الجديد 2026

لناس الجميله اللي سألتني عن حدوته المضارع التام يلا بينا The Present perfect المضارع التام

لما المضارع التام إتولد اُمه وأبوه إتخانقوا يسموه إيه. أبوه قال نسميه تام علي إسم جده وأمه قالت نسميه ( لسه ) وعلشان ماحدش يزعل سجلوه في الورق ( تام ) وبقوا ينادوله ب ( لسه )

إصحابه في المدرسه مابقوش يحبوه علشان إسمه ال ( present perfect ) ومابقوش فاهمين هو إزاي مضارع وتم خلاص وكانوا متلخبطين جداً بس زميله حاول يفهمه وراح قايلله

خد يا ( تام ) السندوتش ده

لا شكراً أنا ( لسه ) واكل ( I have just eaten ) كوارع وكرشه

طب خد عصير

شكراً أنا ( لسه ) شارب ( I have just drunk ) حلبه حصي

طب تيجي نذاكر

أنا ( لسسسسه ) مخلص ( I have done ) الواجب

هو أنا كل ما أقولك حاجه تقولي ( لسسسسسسسه ) عاملها

أنا أصلي ( لسسسسسسسه ) مخلص كل حاجه حالاً علشان كده إسمي ( تام ) لإن اللي عملته تم خلاص ولإنه مش من زمان ولسسسسسسه مخلصه حالاً ولسه ليه أثر ( الكوارع لسسسسسه في بطني ما إتهضمتش - والحلبه لسه في بقي )

فهو قريب للمضارع وملمس معاه فعلشان كده إسمي ( المضارع التام )

طب إنت بتتكون من إيه ؟

بتكون من ( have أو has ) وال past participle اللي هو التصريف الثالث

لا مش فاهمه إمتي have وإمتي has وإيه التصريف الثالث ده !!!

هبسطهالك يا عم ما تستعجلش الضمائر سبعه بنقسمهم تقسمتين

- ( I - you - we - they ) + have + p.p

- ( he - she - it ) + has + p.p

طب ( have /has ) معناهم إيه يملك مثلا

لا خالص مش يملك والمفأجاه إن مالهمش أي معني هما بنلزقهم في النص وخلاص علشان اللي بيسمع يفهم إن ده مضارع تام

يااااه بجد طب إيه التصريف الثالث ده

للفعل في الإنجلش ثلاث أشكال ( أول للمضارع - وثاني للماضي - وثالث اللي بنتكلم عنه ) زي

- work / worked / worked.

- walk / walked / walked.

- call / called / called.

والمفاجأه إن معظمهم زي ما إنت شايفه كده. الثاني زي الثالث أخره ed سمعينا زغروطه بقي

وساعات بيبقي الفعل irregular غير منتظم شكله بيتغير زي

- drink / drank / drunk.

- speak / spoke / spoken.

- choose / chose / chosen.

طيب معناه ايه

دا اسم المفعول ف العربي

بالانجليزي بقي..التصريف التالت

اسم مفعول ....؟ هي دي حصه عربي ياعم انت زهقتني...

طيب اديك قلت... انا زهقان...لو قلتها بالانجاش هاتستخدم التصريف التالت ف زهقان دي هي اسم المفعول

هاتقول. I am bored

وتستخدم التصريف التالت لان انت اللي زهقت فانت المفعول به....

خلي بالك دا فيه اسم الفاعل كمان لو شلت ال ed وحطيت ing لاي فعل بتحوله من اسم مفعول لاسم فاعل

I am boring. انا مُمِل

وبقيت انت الفاعل

ياااه ده سهل أوي أنا ( لسسسسسسسسسه ) حالاً أول مره أفهمها

قلت ( لسه ) يبقي فهمتني يا ولا قولها بقي بالإنجلش

حاضر ( I have understood ) noooooooow