خطا كبير فى تربية الابناء مشكلة تعلق الاطفال بالهاتف

"افتحيله طيور الجنة عشان يبطل زن، دماغنا وجعتنا، هو مبيفصلش؟!".

"اوعي تنسي التابلت وإحنا خارجين أحسن تبقى خروجة ما يعلم بيها إلا ربنا"

.

"بسرعة الحقي هتفتح الجعورة، شغلولها أغنية ماما جابت بيبي".

الكلام ده يا قولناه يا سمعناه من اللي حوالينا يا بنطبقه، وبدرجات متفاوتة مع ولادنا وإحنا مش دريانين.

الأم أول ما يبدأ طفلها يتفاعل مع الدنيا ويطلعله حس، على طول تدور على أي حاجة تكتمه بيها، كأنها بتسد بلاعة بالظبط.

طيب مش هو ده يا ستي البيبي اللي كان نفسك يناغي ويبصلك ويتجاوب معاكي وتسمعي صوته و زنه وعياطه يملا الدنيا كلها؟

ليه مُصرّة تسكّتيه وتلهيه بطرق تخليه عُرضة كبيرة جدًا للتوحد وتأخر النطق والكلام، وتدخليه في دوامة اللف على الدكاترة ، وقلبك يوجعك عليه يوم ورا التاني؟!

في دراسات بتأكد إن القنوات اللي بتعرض أناشيد برتم معين زي "طيور الجنة" وأي قنوات إنشاد من اللي منتشرين دلوقتي، خصوصًا في شهور الطفل الأولى .. بتكون سبب من أسباب التوحد اللا جيني، وبتخلي عندهم أعراض معينة، منها:

* مش هتلاقي تواصل بصري بينك وبين الطفل

* مش هينتبه لو ناديتي عليه باسمه

* لما تحضنيه مش هيتجاوب معاكي.

* مش بيتتبع بنظره حاجات حوالين المحيط اللي هو فيه ، على عكس الأطفال في سنه

* مش بيحب يلعب ولا يتواصل مع حد.

* عدواني بشكل كبير.

* بيعمل لنفسه عالم خاص بيه من اللعب والشخصيات،.

* الطفل هيكون عنده خمول شديد.

والمشكلة الأكبر بقى، إن فيه أمهات بيفرحوا إن اطفالهم هديت وسكتت لما أدمنوا التليفزيون، وبيفرحوا إنهم بطلوا زن، ومش بيركزوا في الأعراض اللي ظهرت عليهم ، خصوصًا لو عندها أطفال أكبر مركزين معاهم أكتر في مذاكرة وامتحانات والذي منه.

بس فعلاً حرام نعمل كده في ولادنا مهما كنا مضغوطين وورانا مسؤوليات، كل حاجة ممكن تستنى، لكن ولادنا لأ..

وحرام نحرمهم من تفاعلهم مع البيئة والناس اللي حواليهم عشان منسمعلهمش حس ونشرب الشاي ونتكلم ساعتين في التليفون بمزاج.

.

الطفل لازم يلعب بإيده ويناغي ويتحرك ويفشكل ويكتشف، عشان يطلع سليم ومتزن..

وللأسف في مجتمعاتنا مفيش توعية كافية حوالين استخدام التكنولوجياالحديثة الضارة ، ومدى الضرر اللي هينتج عنها، وإزاي هيمتد تأثيره السلبي علي النظر والنطق والتواصل.

.

يعني المفروض الأطفال بيتحدد وقت مشاهدة التليفزيون علي حسب السن ، ويكون المحتوى مفيد، مش أناشيد بتتكرر وخلاص، إحنا على أرض الواقع الطفل من أول ما يصحى من النوم لحد ما بينام يا وشه في التليفزيون يا في التابلت، ومن غير ما نتابع هو بيشوف إيه، ودي كارثة لوحدها أصلاً.

.

أرجوكي بلاش تديله الموبايل أو التابلت.

أرجوكي فضّي نفسك واقعدي معاه والعبوا سوا باللعب والدباديب والشخاليل.

احكولهم قصص . العبوا معاهم بالصلصال .. لونوا سوا.. اشتروا مكعبات وطيارات وشاركوهم اللعب،

لكن حرام نسيب ولادنا قدام شاشات عشان نريح دماغنا، ولادنا أهم ويستاهلوا نتعب علشانهم، ولادنا أعظم أمانة ربنا وهبها لنا