رمضان داخل ومش عارفه أصوم ولا أفطر
* ليه يا ماما خير ؟؟
خير إيه انا برٓضّع ابنى ومستحيل أفطر ! ده فرض ربنا
* أيوا يا ماما فرض ربنا مقلناش حاجة بس برضه الرسول قال " لا ضرر ولا ضرار " وربنا قال " فمن كان منكم مريضاً أو على سفرٍ فعدّةٌ من أيامٍ أُخٓر "،، العلماء قالوا ان انتي لو خفتي على نفسك من الرضاعة تتعبي أو علي ابنك "لبنك يخفّ" و "وزنه يقل" فحكمك حكم المريض عشان ربنا يريد اليسر مش العسر والله !
ومين قالك اني هتعب او لبني هيقلّ ؟؟ ما انا أختي الحامل وسلفتى اللي بترضع وبنت عمتي بترضع برضه كلهم صاموا ف رمضان اللي فات
* وحصل لهم حاجة ؟؟
لا أبداً ، أختى سٓقّٓطِت ،،
وسلفتي لبنها نشف وابنها كمل صناعي ،،
وبنت عمي جالها هبوط وعلقنالها محاليل
* وفرحانة أوى حضرتك !!
في الحالة دي "الرخصة" اللي ربنا ادهالنا بتتقلب ل"واجب" ،، وكان واجب على قرايبك دول يفطروا طالما تعبوا او عيالهم اتأذوا بالشكل ده ،، هما مش أرحم من ربنا بيهم دول شددوا على نفسهم وربنا مقالش كده!
يعنى انا اعمل ايه دلوقتي ؟؟ اصوم ولا لأ ؟؟
في الحالة دي عمر الطفل هيفرق معانا
لو الطفل اول ست شهور من العمر وغذائه الأساسي الرضاعة الطبيعية يبقي صعب جداً الصيام
أما لو كان الطفل أكبر شوية ومعتمد علي الأكل جانب الرضاعة يبقي ممكن بس بالخطة التالية
* شوفي إحنا هنحاول نعمل خطة ثمانية الأبعاد عشان نعوضك من حر الصوم ونحافظ على لبنك ، ومنحتاجش للصناعى ركزي معايا يا ست الكل :
في ٨ خطوااااات
ازاى تصومى ، وتحافظى على لبنك ؟؟
١. لو بترضعى طبيعى على صناعى خلى معظم رضعاتك الطبيعي من المغرب للسحور ،، والصناعى كلها وقت الصيام،، لوچيك يعنى ..
٢. لو طبيعى بس ،، يبقى نكتّر السوايل جداً ،، وخلى بالك يبقى متوزع بين الفطار والسحور ،، بلاش موضوع برميل الميه قبل الفجر ده عشان الover dose بتحفز الكلية يتخلص منها بسرعه وتبقى شربتى ع الفاضي!!
٣. أكيد عارفه إن الكافيين والقهوة مدرة للبول وبتفقدك السوايل ،، والمشروبات الغازية بتعمل انتفاخ وعسر هضم ،، بلاش منهم خالص ..!
٤. السوايل لازم متقلّش عن ٣ لتر يعنى من ٨-١٢ كوب متوزعين زى ما قلنا ،، خلى بالك قمر الدين والتمر هندى ،، الخروب والعرقسوس ،، بدايل ممتازة للميه وفيها ألياف بتخلى الامتصاص ياخد فترة والترطيب مستمر طول اليوم ،،،
ومننساش الشوربه يا حاجة عالفطاااار
٥. أوصيكم بالبطيخ والعنب والخيار
البطيخ مالوش حل - نختار الصحراوى عشان بتاع السوق مرشوش- ،، ٩٢٪ ميه ،، مليان ڤيتامينات وخفيف جداً على المعدة ،، لازم يكون في سحورك !
العنب كمان بس خلى بالك بلاش قبل الفجر مباشرة عشان لو مسكر أوى هنعطش ..!
الخيار بأه ده "برنس الخضروات " من ناحية مليان ألياف فبيشبع ،، وكمان نسبة ميه عالية فبيحافظ على رطوبة الجسم ويقلل الجفاف
٦. ملح لأ ، سكريات لأ
طبعاً إحنا مستنيين الشهر الكريم عشان الكنافة بالمانجه والقطايف والبسبوسة بالقشطة والنيوتيلا بلقمة القاضي
السكريات الOver دى هتموتك من العطش ! وهتحسي بالجفاف وانتى بترضعي إبنك
المكسرات المملحة ،، المخللات ،، الزيتون ،، البهارات والتوابل بتزود الحرق catabolism ،، وده بيحسسك بالإجهاد وقلة الطاقة غير العطش طبعاً !!
٧. نقعد في الظل ، بلاش شمس ،،
في المروحة أو التكييف ،، بلاش حرّ ،،،
نريّح جسمنا ،، بلاش شُغل وإرهاق ،،
انتى بترضعي ،، ووظيفتك الأساسية الإرضاع والحفاظ على لبنك للبيبي أغلى حاجة ف حياتك ،، يا ريت نأجل شغل البيت والتعب الإرهاق لبعد الفطار ،، !
٨. ڤيتامينات ولا لبن ؟؟؟ الاتنين
كوب لبن أو مشتقاته عالفطار -يا سلام لو بالتمر- وقطارة ڤيدروب يومياً ليكى ،، وشوربة عالفطار وبطيخ عالسحور ،، وابقى قابليني لو عطشتى أو لبنك قل بإذن الله
**طيب وإمتا أفطر من وجهة نظرك كدكتور أطفال ؟
خمس علامات لو لقيتيهم وانتى بترضعى طبيعى* افطرى رمضان !!
١. لو لبنك قلّ والكمية انخفضت رغم شربك ٣ لتر ميه يومياً .
٢. لو مع دخول رمضان لقيتى البيبي بيعيط بشكل
مستمرّ ،، بيصحى يرضع كتير ،، مش بيشبع ،، !
٣. لو وزن البيبي مش بيزيد ، رغم عدم وجود أمراض ..!
٤. لو تعبتى إنتى من الرضاعة ،، حاسه بهبوط مستمر ،، دوخة وعدم اتزان ،، إنخفاض فى الضغط ،، عطش شديد مع جفاف غير محتمل ومشقة شديدة .
٥. لو إبنك أصلاً تعبان ،، ووزنه مش بيزيد بسبب مرض مُحتمل - زي حساسية اللبن مثلاً - ،، والدكتور بيحاول معاكى إنه يزود لبنك بأى طريقة ،، طبعاً القرار يرجع للدكتور ،، في الحالات دى بفضّل الأم تشرب سوايل كتير في السحور وتاخد مدرات لبن ،، وتصوم يومين ونوزن البيبي تانى ونشوف أعراض قلة اللبن .
لو حصل حاجة من كل ده ،، لازم ترجعى للدكتور بتاع إبنك الأول ، يستبعد إن الطفل يكون تعبان بسبب تانى غير صيامك ،، وهوا اللي يحدد تفطرى ولا لأ ،،
تعليقات
إرسال تعليق