افضل فاتح شهية للاطفال وسبب فقدان الشهية عند الاطفال

٩٩٪؜ من الأطفال اللى مش بياكلوا ومغلبين أهلهم معاهم والأم بتجرى وراهم بالطبق بيكون سببه حاجتين...

- الأول وجود الأكل "المدمر" صحياً فى جدول اليوم .. أعرف أطفال لازم كل يوم ياكلو شوكولاته ،، بسكوت ، عصير ، حلويات ،، شيبسي ، بيبسي .. مش مهم المهم أى "زفت" مضر من برا مليان مواد خافظه وزيوت مهدرجة ومكسبات طعم ورائحة بتدمر " حرفياً " النظام البيولوچى بتاع الأمعاء .. بتأثر على الهضم والإمتصاص .. ب "تسد النفس" بطريقة وهمية .

معلش أنا كطفل قدامى أكل مليان سكر وأكل من غير سكر هاكل ليه البروتين والخضار ؟؟

أكل سكره واضح وصريح وظاهر وسهل الذوبان ومتزين كده هاكل ليه فاكهة واقعد استحمل الألياف عشان احس بطعم السكر ؟؟

عارفين ؟ لو عملتو تحليل براز لمعظم أطفالنا هتلاقو +++++++++ أو بالبلدى "بلاسّات" قدام معظم الأكل .. ليه ؟ بالضبط كده عشان نمط الأكل اللى بنقدمهولهم .

من ٣ أيام أم جاتلى في العياده بتقولى يا دكتور انا أول ما منعت الأكل اللى برا البيت ابنى بدأ يطلب أكل البيت .. يعنى بتنفع اهو والله .. معادلة سهلة جداً .

-الثانى : استمرار تعويد الطفل على الاعتماد "الكلى" على أمه فى الأكل ..

سبحان الله .. تلاقى الطفل ٥ سنين .. ٥ سنين يا مؤمن وبيركب عجل ويلعب سباحه و كورة و بلاي ستيشن و بيحل معادلة فيثاغورث ..

وييجى عند الأكل ميمسكش المعلقة وأمه لسه بتحط الأكل فى "بؤه" لغاية دلوقتى .. أو "لازم" تفتح التليفزيون يا إما مياكلش !!!!

معلش يا ست الأكل انتى اللى عودتيه على كده ..

من ٣ سنين يقدر يمسك المعلقة .. من ٤ ياكل ١٠٠٪؜ زى الكبار ( أساساً المهارة دى بتتكون عند سنة ونص والأم بتنمى أو تهمل).

عارف انك بتأكليه عشان كده أسرع .. بتأكليه عشان تضمنى انه أكل كل حاجة .. بس صدقينى الصعوبة فى الأول بس بعد كده هيتعود .!

يا أمهات دا انتو بتقضوا نص حياتكم فى تأكيل العيال والنص التانى فى الحمام !

باعتماده على نفسه .. ومع الوقت .. هوا اللى هيطلب .. ووظيفتك "بس" اختيار الطعام المناسب .. ووضعه أمامه .. مأكلش ؟؟ مره على مره هيجوع ويطلب بعد ما تكونوا خرجتو مثلاً فيتعلم إنه ياكل ويبطل دلع .. ومتقلقيش مفيش طفل بيموت م الجوع .

طب بالنسبة للطفل الرضيع بعد ٦ شهور ورافض الأكل الحل الوحيد علشان تاكل تجوعيه وتخلي حد يأكله غيرك وهو بياكل ميكنش شايفك ولا حتي سامع صوتك....

وأي طفل المفروض نحلل له صورة دم كل ٣ شهور علشان الانيميا كمان بتسد النفس عن الأكل.....

نفذوا البوست ده وقولولى النتايج ..

والله مفيش حاجة اسمها فاتح للشهية...