كلية الحاسبات والمعلومات 2021 جميع التفاصيل

كلية " الحاسبات والمعلومات "بعد إنتشار الكلية نسبياً آخر فترة زادت رغبة طلاب الثانوية العامة في دخولها مع وجود تساؤلات كتير حوالين : ياترى ايه هي الكلية دي؟ طب هشتغل ايه لما اتخرج منها ومستقبل الشغل دا ايه؟ ايه هو المسمي الوظيفي ليا كـ خريج؟ ازاي أقدر ادخل الكلية وايه هي الأقسام المتاحة ليا؟! 🤔

وأسئلة تانية كتير هنجاوبكم عنها في أول بوست لينا في سلسلة " حاسبات المستقبل " 💪🔥

⁦1️⃣⁩ ياترى ايه هى كلية الحاسبات والمعلومات ! 🚶

هى ببساطة كلية مجالها يعتبر جديد نسبياً وفى تطور مستمر لأنها بتهتم بكل ما يتعلق بـ مجال علوم الحاسب وعلوم البيانات والشبكات، وكمان أنظمة الحماية وأمن المعلومات والاختراق، وغيرها من المجالات الكتير الجديدة والحديثة زى الذكاء الاصطناعى وغيره 🤖

⁦2️⃣⁩ طب انا بعد ما ادرس واتخرج ممكن اشتغل في ايه او ايه يبقى مجال شغلي؟!

مجالات شغل الكليه كتير جداً ومش بس برمجة لأ المجالات مختلفه وكلها مهمة ⚡

خلينا نقول شوية أمثلة مع بعض عشان نوضح مجالات الشغل دي!

• أكيد انت شايف المواقع الكتير اللي موجودة على النت زى فيسبوك وتويتر ومواقع التعليم الاون لاين 👀

دا مجال من مجالات الكلية اللى احنا بنقدر نشتغل فيه وهو مجال الـ "web" هتتعلم فيه ازاى انت اللى تبني موقع كامل زى دا.

• وكمان لو فكرنا في الـ apps اللى موجودة على التليفونات دلوقتي زى واتساب و غيره كتير موجودين على google play

دا برضو مجال من مجالات الكلية هو الـ " mobile application " هتتعلم ازاى تعمل تطبيق كامل يشتغل على التليفون الخاص بيك.

• وكمان مجال زى الـ "gaming" وهو إنك تعمل العاب زى لعبة pubg وكلنا شايفين هي منتشرة ازاي!

• وفي غيرهم مجالات كتير جدا حديثة زى مجال الـ robots والذكاء الاصطناعى اللى شوفناه ف مسلسل يوسف الشريف "النهاية" ومجال شبكات الانترنت وهكذا.. ⁦🧑‍💻⁩

ومجالات غير دى كتير جدا وعشان كدا لسه هنتكلم في بوستس كتير تانية عن معظم المجالات دي 😌💙

⁦3️⃣⁩ طب ايه هو مستقبل شغل الكلية وهل المرتبات بتكون كويسة؟ "نخش في المهم علطول" 💸😂

معندناش أدنى شك إن كلية الحاسبات ومجال شغلها يعتبر من أهم الشغل المطلوب حالياً وكلنا شوفنا في الفترة الاخيرة ازاي التكنولوجيا والانترنت و التعليم الاون لاين كانوا مسيطرين على كل حاجة حرفياً وازاي أثروا على المجتمع وده وإن دل على شئ فـ يدل على إن حاسبات هي المستقبل ! 💥

وبالنسبة للمرتبات فـ بتكون عالية جداً وبتختلف من مجال لمجال بس خلينا نقول إنه على حسب شغلك واجتهادك وتطويرك من نفسك 🌚

مثلاً مجال زى machine learning متوسط المرتب فيه بيكون أعلى من 156 الف دولار فى السنة ومعظم المجالات بيكون مرتباتها عالية حتى فى مصر

لكن الدنيا أكيد مش بتبقي وَردي كدا والموضوع بيحتاج منك بذل مجهود رهيب وعمرك ما بتقدر توقف تعلُّم لأن مجالنا ده مجال متجدد ومستمر 🚶

⁦4️⃣⁩ طب ازاي بقا أقدر أدخل الكلية؟

الكلية تقبل طلاب وطالبات الثانوية العامة من شعبة علمي رياضة وفي الفترة الأخيرة تم فتح أقسام خاصة لطلاب علمي علوم زى قسم Bioinformatics و medical informatics 🧬

بس طبعا لازم تكون معدى الحد الادنى للمجموع , السنه الى فاتت كان 90.71% واحتمال كبير يكون السنادى نفسه بالظبط

الدراسة فى الكلية بتكون باللغة الانجليزية بس متقلقش الموضوع مش صعب ومع الوقت هتتعود.

⁦5️⃣⁩ المسمى الوظيفي ليا كـ خريج بيبقى ايه؟

المسمى الوظيفى بيختلف على حسب المجال اللى هتشغل فيه بس المعظم بيبقى المسمى الوظيفي ليه "مهندس برمجيات" وبيتكتب في البطاقة الشخصية كدا ⁦🖍️⁩

⁦6️⃣⁩ طب ايه هى أقسام الكلية؟!

بتختلف أقسام الكلية من جامعة لـ جامعة تانية بس أشهر أقسام واللى يعتبر موجودين في معظم الجامعات هما "Computer Science , information technology , information system , Software Engineering , Bioinformatics , Medical informatics ....."