فى البداية يجب أن تراعى النقاط الأتية :
1- انت جربت وشفت اسئلة النظام الجديد فى سنة أولى وسنة تانية وعلشان كدة متسمعش كلام حد مجربش النظام دا يعنى لو حد من النظام القديم قالك ذاكر بطريقة معينة قوله ان الطريقة دى متنفعش فى النظام الجديد
2- فى النظام الجديد ممكن تذاكر كتير لكن متعرفش تحل الأسئلة لأنك ذاكرت غلط
3- لما حد يقولك افهم متحفظش ممكن يكون ردك الطبيعى " يعنى اعمل ايه بالظبط " أنا عايز طريقة المذاكرة بالخطوات
4- ممكن يكون فى الكتاب المدرسى تعريف مثلا للجغرافيا السياسية وانت تقول ده حفظ مش فهم وأنا بقولك ان دا فهم مش حفظ فيكون ردك برضو ازاى
وعلشان كدة لازم تحدد مشكلتك فى النظام الجديد فى انك مش بتذاكر صح وانك محتاج تعرف ازاى تذاكر
وكمان لازم تبعد وتخلص نفسك من المعتقدات السلبية والخاطئة مثل :
1- انك مهما ذاكرت مش هتعرف تحل لأن أسئلة النظام الجديد معقدة وتعجيزية " وده مش صحيح "
2- ان النظام الجديد ممكن يتلغى " لا خلاص انت بقيت فيه فلازم تتعايش وتعود نفسك عليه "
3- انك طلعت من سنة أولى وسنة تانية متعرفش حاجة علشان كدة مش هتعرف حاجة فى سنة تالتة " لا برضو ده غلط ممكن تركز فى سنة تالتة بالطريقة الصح للمذاكرة "
والان اعرض عليكم ازاى تذاكروا بالطريقة الصحيحة وبنواتج التعلم الحقيقية :
1- شوف كل مادة وافهم المادة دى عايزة منك ايه لأن لكل مادة طريقة مذاكرة مختلفة فمثلا مذاكرة الجغرافيا والتاريخ تختلف عن الفيزياء والرياضيات
2- اقرأ الموضوع كويس وحاول انك تفهمه " طب ازاى " لو مثلا فى تعريف مكتوب فى التاريخ قوله انت باسلوبك العامى واديله أمثلة من الحياة واستنتج منه معلومات تانية
مثال : تعريف الجغرافيا السياسية هى فرع من فروع الجغرافيا البشرية يهتم بدراسة المقومات الطبيعية والبشرية للدولة وتأثير ذلك فى قوتها وعلاقاتها الدولية
نستنتج من هذا التعريف أن الجغرافيا السياسية :
- تتشابه مع فروع الجغرافيا البشرية وتختلف عن فروع الجغرافيا الطبيعية
- محور دراستها هو الدولة
- تركز فى الدولة على قوتها أو ضعفها
- لها علاقة بالعلوم الأخرى لأنها لن تستطيع تحديد قوة أو ضعف الدولة إلا بالاستعانة بالعلوم الأخرى التى تعطيها صورة كاملة عن الدولة
3- متذكرش بالورقة والقلم زى النظام القديم لكن ممكن تكتب ملاحظاتك – أو ملخص للدرس – أو معلومات اضافية بجانب معلومات الكتاب المدرسى
4- متحلش أسئلة على الدرس بالنظام القديم ومتسمعش أى شرح بالنظام القديم لأنه تعطيل لوقتك
5- حل أسئلة كتير للدرس على النظام الجديد وكل شوية ارجع لمعلومات الكتاب وضيف ليها كل ما تتوصل إليه من معلومات جديدة
6 - ناقش معلميك باستمرار وجادلهم فى المعلومات , واتكلم مع اصحابك عن معلوماتك الاضافية عن الدرس
وفى النهاية لا تقرأ هذا الكلام وتقول دا كلام صعب لأنه بالعكس أسهل كتير من الحفظ أنا عايزك تشوف الأسئلة الجديدة وتبحث وتناقش وتجادل فى الاجابات علشان فى الاخر تكون مقتنع بالاجابة , وكل ما تحل أسئلة أكتر وتناقشها معلومات هتزيد بالتدريج وهتلاقى أسئلة كتير ( مش هقول كلها ) أصبحت سهلة بالنسبة ليك
أما بالنسبة لسؤال " اعمل ازاى فى ليلة الامتحان " دا سؤال سابق لأوانه وباذن الله لما تذاكروا وتفهموا السنة كلها ابقى اقولكم ان شاء الله تعملوا ايه فى ليلة الامتحان
والمهم انك تكون عارف ان النظام الجديد أصبح هو أساس التعليم فلو معرفتش تتعامل معاه بالطريقة بتاعه هتكون بتضيع وقتك ومجهودك على الفاضى
" ذاكر صح هتوفر مجهود , ذاكر صح هتعرف تحل الأسئلة الجديدة , ذاكر صح هتتفوق وتجيب درجات عالية باذن الله "
وتأكد أن لكل مجتهد نصيب , وأن الله لا يضيع أجر من أحسن عملا
نبدأ بسم الله
"أفضل طريقة للمذاكرة فى ظل النظام الجديد "
1_لازم تفهم الدرس فهم عالى (من خلال شرح الدرس بأحدث الطرق العلمية)
2_ذاكر الدرس مرة واحدة (لازم بالورقة والقلم )
3_ حل مجموعة كبيرة من الأسئلة على الدرس بالنظام الجديد (درب نفسك على الحل الالكترونى )
4_ لازم تمتحن كل أسبوع امتحان مشفتش أسئلته قبل كده (unseen)
5_ انقل المعلومات من الذاكرة المؤقتة إلى الذاكرة الدائمة (ذاكرة المدى البعيد)
.....ذاكر حاجة وراجع حاجة هتكسب كل حاجة .......
الزتونة 👈👈👈(إفهم . ذاكر . حل . امتحن. راجع )
لو مشيت على المبدأ ده هتبقي 💯💯💯👌
طبعااا لازم تواجهنا مشكلات ... وزى ما احنا عارفين لكل مشكلة وليها حل 👨🔧
1_ الفهم العالى الشامل للمنهج كله واللى بيعتمد عليه اسئلة الذكاء اللى بتيجى فى النظام الجديد
🔴الحل تكرار مشاهدة فيدوهات شرح المنهج من خلال يوتيوب او اى منصة اخري
2_ مشكلة النسيان
🔴الحل مذاكرة الدرس بالورقة والقلم وحل تمارين متنوعة على المنهج بالكامل باستمرار
3_ المشاكل النفسية مثل اليأس والاكتئاب
🔴الحل ١_ قرب من ربنا وحاول تبدأ يومك بقراءة صفحة من القرأن الكريم مش هتاخد معاك ١٠ دقائق .
٢_ حافظ على الصلاة عشان ربنا يكرمك .
٣_ ارسم صورة هدفك وعلقها فى غرفتك عشان لما تحس انك زهقت من المذاكرة تبص عليها وتديك تحفيز .
4_ مشكلة الإمتحانات ان كل أسئلتها غريبة وعمرك مشفتها قبل كده
🔴الحل حاول تعمل كشكول كبير تلم فيه كل الأفكار والأسئلة الصعبة اللى بتقابلك وانت بتحل وراجعها باستمرار
5_ مشكلة المدرسين (فيه مدرسين كتير هتفضل شغالة بالنظام القديم )
🔴الحل هو ان المدرس يطور نفسه ويحاول يجيب اسئلة مبنى عليها النظام الجديد ويطرحها على طلابه ويحلها معاهم
بس كده ي أصدقاء حبيت أوجه بعض النصائح ي رب تكونوا استفادتوا من تجربتي ...
تعليقات
إرسال تعليق