القائمة الرئيسية

الصفحات

أخبار الاخبار

حل مشكلة النوم عند الاطفال

 مشكلة نوم الاطفال تمثل مشكلة كبيرة لاى ام عشان كدة جبتلكم الحل الامثل لموضوع النوم عند الاطفال  وهرد عليكم فى استشاراتكم 
د- هانى

إبنك مغلبك في النوم .. مش عارفة تعملي إيه عشان تساعديه على تظبيط نومه ؟ أقولك أنا ..
أولا : البيت كله ينام مع بعضه .. موضوع أنيم العيال عشان أعرف أقعد ساعتين كده في راحة بال و إستجمام ده مش هينفع أبداً .. على الأقل في الأول .. الطفل طول ما حد صاحي في البيت مش هينام .. و لو نام هيصحى بعد شوية أول ما يحس إن الكبار لسه صاحيين
ثانيا: ماينفعش تشغله التلفزيون أو تسيبه على الايباد قبل النوم بساعتين على الأقل .. المخ بيحتاج إن إشاراته العصبية تهدى عشان الطفل يعرف ينام .. بس حضرتك بتحفزيها بقعدته قدام التلفزيون و الايباد .. بيقفلهم من هنا ويدخل على السرير .. مخه شغال .. بيفكر و بيتخيل و بيكمل اللي كان بيعمله في مخه .. و حضرتك مستغربه ليه مش بينام !
ثالثا: بلاش لبس زيادة ! وقت النوم .. متنيميش إبنك حران .. مش هيعرف ينام و هيقلق .. الجو البارد نسبيا بيحفز إفراز مادة إسمها الميلاتونين و دي بتساعد على النوم .. ربنا خلق طبيعي الليل أبرد من النهار و فيه حكمة في كده ..
رابعا : هنوفر بيئة صحية للنوم .. البيئة الصحية للنوم هي (( البيئة الهادئة - خافتة الإضائة - على سرير مريح في وضع مستقيم )) .. النوم قصاد التلفزيون أو في العربية ماسموش نوم و طبعا مش صحي ولا كفاية للطفل
خامسا: الاربعة ثوابت !
1. ميعاد ثابت : النوم لازم يكون له ميعاد ثابت و مقدس .. الجسم بيظبط ساعته البيولوجية بالتعود على ميعاد نوم محدد و ثابت كل يوم .. بعد كده الطفل هو اللي هيطلب من نفسه إنه ينام في الميعاد ده .. خروجاتنا و زياراتنا و انشطتنا لازم تتظبط على الميعاد ده مش العكس ..
2. برضو معاد ثابت و مقدس بس للصحيان: .. زي ما ميعاد النوم لازم يبقى ثابت .. ميعاد الصحيان برضه يبقى ثابت .. لو في يوم صحينا بدري عن ميعادنا يبقى أكيد الطفل هينام بدري عن ميعاده و بعد كده هيلخبط نومه
3. مكان ثابت : طفلك ينام في سريره اللي اتعود عليه كل يوم ميغيروش
4. روتين ثابت : لازم حضرتك تحاولي تخلقي نوع من النظام و الروتين اليومي المتعلق بوقت النوم .. زي مثلا حمام دافي .. غسيل الأسنان .. ملابس خاصة بالنوم .. حكاية قبل النوم .. الطفل مع التكرار هيربط الطقوس دي لا اراديا بالنوم .. و هيسهل عملية دخوله في النوم بصورة أكتر سلاسة
بس و إحنا بنعمل كل ده نخلي بالنا و لو قابلتنا أي مشاكل من ((نوم متقطع - أقل من الطبيعي - أكتر من الطبيعي - نعاس طول النهار - صراخ فجائي بالليل)) يبقى لازم الدكتور يشوفه عشان نستبعد إضطرابات النوم
ملحوظة: محدش يتكلم عن حاجة اسمها تنظيم نوم قبل سن السنة للسنة و نص
هل اعجبك الموضوع :

تعليقات